Лабораторија за основи на електротехника

Лабораторијата за основи на електротехника припаѓа на Институтот за електро-термија, електрично заварување и електричен сообраќај. Основана е при Електротехничкиот факултет во Скопје во 1968 година и во текот на изминатиот период бележи постојан развој и проширување на дејноста. Во неа се негуваат и развиваат трите основни универзитетски дејности: наставна, научно-истражувачка и апликативна.

Првите кадри на оваа лабораторија, во периодот на нејзиното основање, се проф. Екатерина Чундева-Галиќ, основач и прв раководител, проф. д-р Панчо Врангалов, долгогодишен раководител на Лабораторијата, како и вишиот стручен соработник, инж. Стојан Николовски. Денес во работата на оваа лабораторија учествуваат сите членови на ИЕТЕЗЕС, раководител е вон. проф. д-р Марија Кацарска, а виш стручен соработник е дипл. инж. Љупчо Карајанов.

Во наставата ЛОЕ ги развива фундаменталните електротехнички дисциплини основи на електротехника 1 и основи на електротехника 2, како и неколку дисциплини на до дипломските и постдипломските студии поврзани со електромагнетното поле и неговото влијание врз околината. Лабораторијата е опремена со голем број инструменти кои се користат за практична настава и со кои пред студентите се демонстрираат основните закони на електротехниката. Покрај инструментите за мерење на струја, напон и отпорност, Лабораторијата располага со доволен број макети за изведување на лабораториските вежби, како и персонални сметачи за изработка на симулационите вежби.

ЛОЕ е целосно отворена и за воннаставни активности со максимална можност за изведување практични студентски проекти (студентски работилници, студентски истражувачки проекти, изработка на дипломски работи од кои повеќето се со практична реализација итн.). Во Лабораторијата наставата и научно-истражувачката дејност формираат нераскинлива целина - наставниците се занимаваат со научни истражувања, односно истражувачите држат настава.

Во поглед на научните истражувања, ЛОЕ развива истражувачка дејност во повеќе области: анализа на електромагнетни полиња од повеќе извори и во различни средини, влијание на електромагнетното поле врз околината, компјутерски методологии во екологијата и слично. На тој начин во рамките на меѓународниот проект од FP6 програмата SAFE EMF, целосно реализиран од кадар на Институтот за електротермија, електрично заварување и електричен сообраќај, набавени се 5 различни сета опрема за мерење и анализа на електрични и магнетни полиња во широк спектар на фреквенции: од индустриски до радиофреквенции. Опремата им е на располагање на студентите на магистерските студии. Во рамките на Темпус проектот за развој на наставни програми од Еко-информатиката, добиена е и мерна опрема која ја користат студентите на магистерските студии.