Стипендии
Стипендии за идните студенти
Идните студенти што ќе се запишат во прва година на ФЕИТ имаат можност да добијат стипендии.
- Трите електроенергетски компании АД МЕПСО, АД ЕЛЕМ и ЕВН Македонија ќе доделат стипендии на 14 студенти од прва година на електроенергетските насоки по завршувањето на првиот семестар. Висината на стипендијата изнесува 100 евра месечно, во период од 10 месеци како и продолжување на стипендијата до крајот на студирањето доколку задржат просечна оценка над 8.0.
- УКИМ ќе додели стипендии на 10 кандидати на конечните ранг-листи на примени кандидати со завршена државна матура, во категоријата редовни студенти, во првиот уписен рок во академската 2017/2018 година. Стипендијата ја покрива школарината за студирање за академската 2017/2018 година.
- ФЕИТ ќе додели стипендии во висина на школарината од 200 евра на сите запишани студенти во прва година, кои што во текот на своето средно образование освоиле:
- Прво место/награда на акредитирани државни натпревари или на државната смотра на Народна техника по некои од следниве предмети: математика, физика, информатика, електротехника, автоматика или од други области што се негуваат на Факултетот;
- Прва, втора или трета награда на меѓународни олимпијади на знаења, балкански или светски првенства по некои од следниве предмети: математика, физика и информатика.
- ИНСТИТУТОТ ЗА ЕЛЕКТРОНИКА ќе додели пет стипендии во прва година во висина на школарината од 200 евра на студентите пријавени за упис на програмата КХИЕ кои се највисоко рангирани при уписот.
- ИНСТИТУТОТ ЗА ТЕЛЕКОМУНИКАЦИИ ќе додели пет стипендии во висина на школарина од 200 евра на кандидати пријавени за упис во прва година на студиската програма ТКИИ. Стипендиите ќе бидат доделени на петте прворангирани кандидати на оваа студиска програма, кои оствариле минимален успех од вкупно 95 поени од средно училиште. Услов за продолжување на стипендијата во наредната студиска година е стипендистот да покаже одлични резултати во студирањето во претходната студиска година.
- МАКО СИГРЕ ќе додели една годишна стипендија во висина на школарината од 200 евра за најдобриот средношколец што ќе се запише на електроенергетските насоки и не добил стипендија по друга основа.
