Екипа на ФЕИТ повторно ОСВОИ ПРВО МЕСТО на меѓународниот студентски натпревар HARDWARE & SOFTWARE

На VIII Mеѓународен натпревар Hardware & Software, H&S 2012, што се одржа од 29.10. до 03.11.2012 год. на Електротехничкиот факултет во Бања Лука, Босна и Херцеговина, екипата на Факултетот за електротехника и информациски технологии (ФЕИТ) при Универзитетот „Св. Кирил и Методиј“− Скопје го потврди успехот од минатата година и повторно го освои првото место. Оваа година тимот го сочинуваа студентите: Татјана Чавдарова, Викториа Донева, Александар Лазаров и Сашко Јовановски. Тимот го предводеа Дарко Цветковски и Бранислав Геразов, под менторство на проф. д-р Гоце Арсов. Подготовките ги организираше Институтот за електроника на ФЕИТ, со студенти од модулите Електроника и Компјутерска техника и информатика. Македонските претставници со својата посветена и напорна работа успеаја да победат во силната конкуренција меѓу шест екипи од Романија, Србија, Босна и Херцеговина и Македонија и да го освојат првото место на овој значаен натпревар од меѓународно ниво.

Задачата на натпреварувачите беше да се направи роботски систем за играње на играта „Поврзи 4“ во која двајца играчи во табла од 6 Х 7 полиња играат наизменично и се обидуваат да поврзат 4 полиња во линија. Системот требаше да се изведе со употреба на роботска рака, микроконтролер, веб камера и персонален компјутер. Во реализацијата требаше да се дизајнираат и имплементираат алгоритми за: процесирање на слика за препознавање на полето и одиграните потези; за одбирање на следниот потег со употреба на вештачка интелигенција; за управување на роботската рака и за комуникација меѓу микроконтролерот и компјутерот. (http://indel.etfbl.net/hs/task.html)

Со оваа победа, тимот од ФЕИТ го докажа високото ниво на подготвеност на студентите, како и високиот квалитет на образовниот процес на овој факултет.